Kryeministri i Kosovës, Albin Kurti, sot ka vizituar fshatin Varagë të Zubin Potokut, ku ka ndodhur shpërthimi i mbrëmshëm në kanalin e Ibër Lepencit.
Gjatë kësaj vizite, ai u shoqërua edhe nga ministri i Punëve të Brendshme, Xhelal Sveçla, drejtori i Policisë së Kosovës Gazmend Hoxha, drejtori i AKI-së, Petrit Ajeti, si dhe Kryeshefi Ekzekutiv i “Ibër Lepencit”, Faruk Mujka.
“Sot së bashku me ministrin Sveçla, Drejtorin e Policisë së Kosovës, Hoxha dhe Drejtorin e AKI-së, Ajeti dhe Kryeshefin Ekzekutiv të “Ibër-Lepencit”, Mujka ishim në fshatin Varagë të Zubin Potokut, tek kanali i dëmtuar nga shpërthimi i mbrëmshëm”, ka shkruar Kurti.
Ai ka theksuar sërish se sulmi i mbrëmshëm ka pasur për qëllim cenimin e sigurisë së Kosovës.
“Sulmi dhe shpërthimi i mbrëmshëm kishte për qëllim dëmtimin e pariparueshëm të infrastrukturës kritike dhe rrjedhimisht cënimin e sigurisë kombëtare dhe defunksionalizimin e jetës normale në vendin tone”, ka shkruar Kurti.
