Policia e Kosovës ka njoftuar se ka pezulluar përkohësisht nga puna dy zyrtarë policë, pasi të njëjtit dyshohet të jenë përfshirë në aktivitete dhe komente politike gjatë fushatës parazgjedhore për balotazh.
“Suspendimi i tyre është mbështetur në autorizimet ligjore, udhëzimin administrativ Nr.04/19 për shkeljet, masat dhe procedurat disiplinore në Policinë e Kosovës, për të vazhduar me procedurat e mëtejme” thuhet në komunikatën e PK-së.
Sipas policisë, njëri nga zyrtarët ishte me detyrë në kuadër të departamentit të hetimeve, ndërsa tjetri me detyrë në kaudër të departamentit të kufirit.
Ky është njoftimi i plotë i policisë:
Me datë 13.11.2021, Policia e Kosovës ka suspenduar përkohësisht dy zyrtarë policorë, njëri me detyrë në kuadër të departamentit të hetimeve dhe tjetri me detyrë në kuadër të departamentit të kufirit, pasi që dyshohet se të njëjtit janë përfshirë në aktivitete dhe komente politike gjatë fushatës parazgjedhore- balotazhi 2021, që paraqet shkelje të rëndë disiplinore.
Suspendimi i tyre është mbështetur në autorizimet ligjore, udhëzimin administrativ Nr.04/19 për shkeljet, masat dhe procedurat disiplinore në Policinë e Kosovës, për të vazhduar me procedurat e mëtejme.
Policia e Kosovës, do të vazhdojë angazhimet e saja në realizimin e detyrave dhe autorizimeve ligjore, duke qenë profesionale në shërbim të vendit dhe të gjithë qytetarëve pa dallime, andaj nuk do të tolerojë përfshirjen e asnjë punonjësi në aktivitete apo veprime që bien në kundërshtim me dispozitat ligjore dhe udhëzimet administrative të PK-së.
