Zëdhënësja e Lidhjes Demokratike të Kosovës (LDK), Sibel Halimi ka reaguar pas vizitës që kryeministri Albin Kurti ka bërë në Maqedoninë e Veriut, shkruan Gazeta Metro.
Halimi, përmes një postimi në profilin e saj në rrjetin social Facebook, ka shkruar se derisa shoqërinë kosovare e ndau në dysh, tash ia ka mësy edhe shqiptarëve të Maqedonisë së Veriut.
Sipas saj, Kurti po shndërrohet në përçarës i shqiptarëve kudo që jetojnë në hapësirat e tyre.
Më poshtë postimi i saj i plotë:
Pasi e ndau në dysh shoqërinë kosovare, tentoi në Shqipëri, por dështoi, në Preshevë për një këshilltare shqiptarët i bëri pik e pesë, tash ua ka mësy edhe shqiptarëve të Maqedonisë së Veriut.
Albin Kurti, nuk e ka ndërmend të merret me problemet jetësore të qytetarëve të Kosovës, duke pretenduar të shndërrohet në figurë historike të shqiptarëve, sipas ambicies së tij populliste.
Por si peng i historicizmit ai po shndërrohet në përçarës i shqiptarëve kudo që jetojnë në hapësirat e tyre.
