E hëna e 7 gushtit u shënua me një sërë ngjarjesh të rënda. Pasditen e djeshme ndodhi vrasja e një personi në një kafiteri në komunën e Klinës. I dyshuari, Tush Frroku i cili ndodhet në kërkim dhe për arrestimin e tij policia ka apeluar qytetarët të japin informata nëse kanë njohuri për vendodhjen e tij.
Sipas Policisë, i dyshuari për vrasje gjatë arratisjes nën kërcënimin e armës ka grabitur veturën nga një qytetar dhe është larguar në drejtim të Gurrakocit. Vetura është gjetur më pas e braktisur në fshatin Kosh të Istogut, ndërsa personi i dyshuar është ende në kërkim policor.
Një rast tjetër i rëndë ishte ai i dy fëmijëve në fshatin Vraniq të Suharekës, ku dy fëmijëve, vëlla e motër u ranë dyert e një oborri të një shtëpie sipër, dhe si pasojë vëllai ka vdekur, ndërsa e motra fillimisht ishte në gjendje shumë të rëndë shëndetësore.
Ndërsa, një grua në Deçan dyshohet se gjatë ditës së djeshme ka kryer vetëvrasje.
“Nga QKMF është informuar se nga familjar është sjell pa shenja jete viktima femër kosovare. Viktima dyshohet se në rrethana të panjohura ka kryer aktin e vetëvrasjes. Me vendim të prokurorit trupi i pa jetë i viktimës është dërguar në IML për obduksion”, thuhet në raporton e Policisë.
E një vrasje në tentativë ka ndodhur dje në Fushë Kosovë, ku dy persona janë goditur nga një veturë e cila është larguar në drejtim të panjohur.
