Kryenegociatori i Kosovës në dialog me Serbinë, Besnik Bislimi, ka thënë se gjatë takimit që pati sot me emisarin e BE-së, Miroslav Lajçak, ka folur edhe për termat e referencës për komisionin e përbashkët që ka të bëjë me zbatimin e Deklaratës për Personat e Pagjetur.
Bislimi tha se në këtë çështje, pala kosovare ka pasur disa komente, ku sipas tij, pjesa më e madhe e tyre është pranuar nga Lajçaku.
“Ka mbetur vetëm një koment substancial, me të cilin ata duhet të merren dhe mendoj që ky dokument është shumë afër adoptimit final, i cili do t’i hapte rrugë edhe funksionalizimit të komisionit të përbashkët”, tha Bislimi, njofton Klankosova.tv.
Tutje, ai tha se me Lajçakun, ka folur edhe për termat e referencës për komitetin e përbashkët që merret me monitorizimin e zbatimit të marrëveshjes bazë.
“Pala kosovare ka prezantuar komentet e veta. Komentet tona kanë të bëjnë kryesisht me nevojën që Komiteti i përbashkët të mbetet brenda kornizave të parapara me marrëveshjen bazike, që nënkupton një komitet që merret vetëm me monitorimin e marrëveshjes dhe s’ka kompetenca vendimmarrëse. Kemi shkëmbyer dokumentet dhe edhe këtu presim të ecim tutje”, tha ai.
“Në Bratislavë është eliminuar ky keqkuptim dhe jemi shumë afër nënshkrimit të kontratës mes KEDS-it dhe Elektroseverit”, tha Bislimi, njofton Klankosova.tv.
Tutje, Bislimi tha se ka ide nga Lajçak që plani i sekuencimit kërkon takim të nivelit të lartë, sepse, siç tha ai, kryenegociatorët nuk mund ta përfundojnë këtë proces.
