Zëvendëskryeministri i Kosovës, Besnik Bislimi, e ka kritikuar Bashkimin Evropian se është duke i mbajtur anë Serbisë, duke përmendur rastin e kidnapimit të tre zyrtarëve policorë nga policia serbe në territorin e Kosovës.
“Vrazhdësia me të cilën Serbia po shkel marrëveshjet është e krahasueshme me vullnetin e Brukselit për t’i mbyllur sytë karshi këtyre shkeljeve”, ka qenë shkrimi i Bislimit në rrjetin social Facebook.
Ndërkohë, për këtë reagim të Bislimit, pati kritika nga opozita, kryetarja e Forumit të Gruas së Lidhjes Demokratike të Kosovës, Jehona Lushaku-Sadriu, ka thënë se në situatën alarmante të cilën është Kosova, Bislimi po ironizon me Brukselin.
“Ti, zëvendëskryeministër përfaqëson një shtet sovran, të është sulmuar shteti, si mund të jesh kaq joserioz e të ironizosh me Brukselin, kur ke nevojë për përkrahjen e tyre?!”
“Si mund t’i kthesh policët nga një shtet armik pa përkrahjen e ndërkombëtarëve? Vendi në rrezik! Qeveri e papërgjegjshme me veprime të rrezikshme!”, ka shkruar Lushaku-Sadriu.
Pas kidnapimit të policëve kosovarë, Qeveria e Kosovës ka anuluar importimin e mallrave dhe produkteve serbe në Kosovë.
