RefuzimiMesfshori Uran Bislimi ka deklaruar se nuk ka vendosur kundër Kosovës, por pro Zvicrës.
Futbollisti i Luganos refuzoi dy herë Kosovën për Zvicrën, kombëtare kjo që e ftoi për ndeshjet e qershorit.
Në një intervistë për “rsi.ch”, Bislimi ka komentuar arsyen pse e refuzoi Kosovën duke thënë se ka pasur ëndërr të luajë për Zvicrën.
“Linda në Bazel dhe u rrita si futbollist në Zvicër. Vendimi im s’ka qenë kundër Kosovës, por një vendim pro Zvicrës”.
Ai gjithashtu tha se ka mbetur i shokuar në momentin kur e mori ftesën e parë të Zvicrës.
“Isha në shtëpi dhe në momentin e parë mbeta i shokuar, nuk mund ta besoja. Nëse dikush para dy viteve do të më kishte thënë se do të isha këtu me kombëtaren, asnjëherë s’do ta besoja, por isha i bindur në aftësitë e mia dhe jam i lumtur që jam këtu”.
“Është ëndërr e fëmijërisë që u bë realitet. Lugano ma dha shansin në Superligë (të Zvicrës), ku mora hapat is futbollist dhe u rrita falë besimit të klubit”, nënvizoi Bislimi.
Menaxheri i Kosovës Bajram Shala muaj më parë konfirmoi për refuzimin që Bislimi i bëri shtetit kosovar, atë duke e refuzuar ftesën me anë të klubit.
“Uran Bislimi e kishte konfirmuar ardhjen për ndeshjet e marsit, por më pas e refuzoi Kosovën për herë të dytë brenda pak muajsh. Në shtator na kishte refuzuar me arsyetimin duke ia gjuajtur topin klubit të tij, Lugano. Në nëntor erdhi, shënoi gol dhe e puthi emblemën.
“Ndërsa tash na refuzoi përmes klubit të tij, nuk kishte as guxim e as respekt për të na kumtuar lajmin e refuzimit. Ne ia kishim siguruar edhe biletën e udhëtimit. Por, klubi i tij na tha se lojtari nuk dëshiron ta djegë mundësinë për ta përfaqësuar vendin tjetër tek i cili ka nënshtetësi, Zvicrën. Por, nëse ai e ka këtë dilemë, mund të luajë për Zvicrën pasi Kosova më nuk është opsion për Bislimin”.
