Katër persona kanë vdekur gjatë ditës së djeshme në Kosovë, tri femra dhe një mashkull.
Një femër në Shtime është dërguar në QKMF në gjendje të rënduar shëndetësore, por mjeku ka konstatuar vdekjen e saj.
Në Vushtrri një femër është raportuar se ka rënë në bunar, derisa fatkeqësisht aty ka gjetur vdekjen. Të dy rastet janë cilësuar si vdekje të dyshimta dhe hetim i vdekjes.
Ndërsa në Drenas dhe Skenderaj, kanë ndodhur dy aksidente trafiku ku kanë vdekur një grua dhe një burrë.
Raporti i plotë i Policisë:
Shtime 06.06.2023 – 07:27. Viktima femër kosovare pas përkeqësimit të gjendjes shëndetësore është dërguar në QKMF, por nga mjeku është konstatuar se viktima ka ndërruar jetë. Me urdhër të prokurorit, trupi i pajetë i viktimës është dërguar në IML për obduksion. Rasti duke u hetuar.
Vushtrri 06.06.2023 – 14:00. Është raportuar se një femër kosovare ka rënë në bunar. Njësia e zjarrfikësve, emergjenca dhe policia kanë dalë në vendin e ngjarjes dhe kanë tërhequr trupin e pa jetë të viktimës. Vdekjen e saj e ka konstatuar mjeku. Me vendim të prokurorit trupi i pa jetë është dërguar në IML për obduksion.
Gllogoc 05.06.2023 – 18:43. I dyshuari mashkull kosovar derisa ishte duke drejtuar veturën dyshohet nga pakujdesia ka goditur viktimën femër kosovare, të cilës i ka shkaktuar lëndime të rënda. Viktima pasi është dërguar në QKUK për tretman mjekësor, dyshohet për shkak të lëndimeve ka ndërruar jetë. Me urdhër të prokurorit, trupi i pajetë i viktimës është dërguar në IML për obduksion.
Skenderaj 06.06.2023 – 14:30. Ka ndodhë një vetëaksident me ngasës mashkull kosovar. Si pasojë e aksidentit lëndime trupore kanë pësuar ngasësi dhe pasagjerja kosovare. Të lënduarit janë dërguar në QKUK për tretman mjekësor, pasagjerja është liruar në shtëpi, ndërsa ngasësi i veturës ka ndërruar jetë në QKUK. Me urdhër të prokurorit trupi i pa jetë i viktimës është dërguar në IML për obduksion
