Kryeministri i vendit, Albin Kurti, ka deklaruar se nuk do të zmbrapset kundër, siç tha ai, milicisë serbe që po kryeson protestat e dhunshme në veri.
Në një intervistë për CNN, kryeministri Kurti tha se Qeveria e Kosovës ka siguruar pamje me video dhe foto të pjesëtarëve të milicisë serbe, që janë dërguar nga Serbia për të destabilizuar veriun e vendit, shkruan gazeta online Reporteri.net.
Serbinë, Kurti e quajti “autokraci pro-ruse”.
“Kemi dhjetëra video-filmime dhe foto të cilat tregojnë se milicia serbe është në vijën e parë të turmës së dhunshme, këta janë njerëz që i kemi identifikuar që vijnë nga Serbia. Fqinji ynë Serbia është një autokraci pro-ruse, kështu që atje nuk ka shumë demokraci. Kanë urdhëruar xhandarmërinë që të vijë dhe të bëjë trazira në veri të Kosovës”, deklaroi ai.
Tutje, kryeministri tha se ndërkombëtarët i kanë njohur si legjitime rezultatet e zgjedhjeve në veri, ndaj nuk sheh arsye pse kryetarët e rinj të pengohen që ta kryejnë punën e tyre.
“Të gjitha organet ndërkombëtare i njohën zgjedhjet. Pasi të njihni zgjedhjet dhe rezultatet, kryetarët duhet të shkojnë në objekte komunale. Kush tjetër nëse jo kryetarët?”, tha Kurti.
Kryeministri u shpreh i gatshëm të bashkëpunojë me ndërkombëtarët, por tha se Republikën e Kosovës nuk do t’ia dorëzojë “milicisë fashiste”.
“Unë jam duke punuar ngushtë me faktorët ndërkombëtarë, veçanërisht me SHBA-në dhe BE-në, i konsiderojmë të dy aleatë dhe partnerë të domosdoshëm dhe do të bëjmë më të mirën, por nuk do t’ia dorëzoj republikën demokratike milicisë fashiste”.
