Polica e Kosovës, ka dhënë një komunikatë për situatën në veri të vendit, ku serbët po protestojnë kundër kryetarëve të rinj të komunave të Leposaviqit, Zubin Potokut dhe Zveqanit, ku është shprehur se, angazhimet policore në zbatimin e rendit, ofrimin e sigurisë ndaj qytetarëve, liria e lëvizjes, do të jenë ndër objektivat dhe detyrat primare të PK’së, shkruan Gazeta Metro.
Në komunikatën e PK’së, theksohet edhe se para objektit të komunës së Zveçanit, protestuesit e mbledhur ne komunat veriore, kanë shfaqur dhunë e duke hedhur gaz lotsjellës, kanë tentuar të kalojnë kordonët e sigurisë për tu futur në objektin e komunës. Për këtë, PK’ja ka përdor mjetet e ligjshme si sprej për të ndaluar protestuesit dhe për të vënë situatën nën kontroll.
Komunikata e plotë:
Angazhimet policore lidhur me ruajtjen e rendit dhe sigurisë publike ne veri të vendit
Prishtinë, më 29 maj 2023
Angazhimet policore në zbatimin e rendit dhe sigurisë publike, ofrimi sigurisë ndaj qytetarëve, liria e lëvizjes së lirë si dhe ndërmarrja e masave policore konform situatës dhe zhvillimeve në veri të vendit, do të vazhdojnë të mbesin ndër objektivat dhe detyrat primare të Policisë së Kosovës.
Sot, në veri të vendit është paralajmëruar të mbahen protesta/tubime, andaj lidhur me këtë Policia e Kosovës duke njohur të drejtën për tubime publike përmes protestës paqësore, sipas detyrës zyrtare po kujdeset për ruajtjen e rendit dhe qetësisë publike si dhe detyrave të përcaktuara sipas Kushtetutës së Republikës së Kosovës dhe legjislacionit në fuqi.
Protestuesit në forma të organizuara janë tubuar para objekteve të komunave të veriut si në Leposaviq, Zubin Potok dhe Zveqan për të protestuar, ku para objektit të komunës së Zveqanit protestuesit duke shfaqur dhunë dhe duke hedhur gaz lotsjellës kanë tentuar të kalojnë kordonët e sigurisë për tu futur me dhunë në objektin e komunës, ku Policia është detyruar të përdor mjetet e ligjshme si sprej-in, për të ndaluar protestuesit dhe për të vënë situatën nën kontrollë.
Protestat pran komunave veriore janë duke vazhduar, Policia e Kosovës është duke menaxhuar situatën, njëkohësisht fton qytetarët që të kenë vëmendje dhe kujdes të shtuar përgjatë thirrjeve të protestave, të protestojnë në mënyrë të qetë dhe të mos bien pre e provokimeve të mundshme, të çfarëdo natyre qofshin ato.
