Analisti Shkelzen Maliqi beson se autoritetet në Prishtinë duhet të dëgjojnë këshillën e ambasadorit amerikan në Kosovë, Jeffrey Hovenier, që kryetarët e sapozgjedhur në veri të marrin përsipër vetëm një rol teknik, e jo politik.
Mirëpo, Maliqi tha për Kosova Online se nuk është i sigurt nëse kryeministri i Kosovës Albin Kurti e ka dëgjuar dhe kuptuar saktë mesazhin e diplomatit amerikan, përcjellë Gazeta Papirus.
Kur është fjala për vazhdimin e dialogut ndërmjet Serbisë dhe Kosovës, i cili me sa duket është sërish në ngërç, Maliqi tregon se pas takimeve në Ohër, kur u dakordua për aneksin e zbatimit të marrëveshjes së Brukselit nga shkurti, ofensiva diplomatike e ndërmjetësuesve ndërkombëtarë është qetësuar disi.
“Ofensiva diplomatike u qetësua pas Ohrit dhe, me sa shohim, nuk ka sanksione për vonesa në përmbushjen e detyrimeve nga marrëveshja. Nëse nuk ka presion, Aleksandar Vuçiq dhe Albin Kurti do të inkurajohen edhe më shumë të vazhdojnë me pengesat. Mendoj se plotësojnë njëri-tjetrin në mënyrë perfekte”, thotë Maliqi.
Ai shton gjithashtu se vëmendja e bashkësisë ndërkombëtare dhe përpjekjet e tyre politike dhe diplomatike në një nivel më të gjerë janë aktualisht të përqendruara në Ukrainë.
“Nga ana tjetër po ikën koha për vendosmërinë amerikane për të bërë progres më serioz në normalizimin e marrëdhënieve ndërmjet Serbisë dhe Kosovës, sepse së shpejti në SHBA do të fillojë fushata për zgjedhjet presidenciale dhe fokusi do të jetë në të“, thotë Maliqi.
