Misioni i Bashkimit Evropian për Sundimin e Ligjit në Kosovë (EULEX) ka rritur nivelin e gatishmërisë në Mitrovicën e Veriut ku sot është betuar kryetari i sapozgjedhur Erden Atiq, kanë thënë për Kosova Online nga EULEX-i, duke theksuar se forcat e tyre janë në gatishmëri 24 orë në ditë dhe janë gati për një reagim të shpejtë.
“Për sa i përket ceremonisë së betimit, EULEX-i ka ngritur nivelin e gatishmërisë. Njësiti policor i formuar i Misionit dhe njësiti policor rezervë janë të gatshëm të mbështesin Policinë e Kosovës si përgjegjëse për situatën e sigurisë, nëse kërkohet dhe nëse është e nevojshme në ruajtjen e stabilitetit të Kosovës dhe sigurisë së të gjitha komuniteteve në ato zona”, tha EULEX-i.
EULEX tha se po monitoron nga afër ngjarjet në veri të Kosovës përmes pranisë së njësisë së formuar policore dhe njësisë policore rezervë, si dhe këshilltarëve të tyre të lartë policor dhe personelit tjetër të pranishëm në atë zonë, dhe në koordinim të ngushtë me Policinë e Kosovës dhe KFOR-in.
Ndërkaq KFOR-i ka thënë se do ta monitorojë situatën dhe do ta mbajë një nivel të lartë të gatishmërisë së njësive të tij për të përballuar çdo skenar të mundshëm.
“Me rastin e betimit të kryetarit të Mitrovicës dhe situatës në përgjithësi sigurinë do ta bëjë Policia e Kosovës. KFOR-i vazhdon të monitorojë situatën dhe të mbajë një nivel të lartë të gatishmërisë së njësive të tij për të përballuar çdo skenar të mundshëm, duke pritur që institucionet në Kosovë ta trajtojnë situatën në mënyrë efikase”, thuhet në përgjigjen e KFOR-it për rtv 21.
Sipas KFOR-it komandanti mbetet në kontakt të ngushtë me të gjithë bashkëbiseduesit e tij kryesorë, përfshirë përfaqësuesit e EULEX-it, UNMIK-ut, OSBE-së, institucioneve në Kosovë dhe Organizatave të Sigurisë së Kosovës.
