Avokati Berisha: Nuk ka asnjë provë për dënimin e Naser Kelmendit

Besnik Berisha, avokat i Naser Kelmendit, ka thënë se klienti i tij është dënuar pas asnjë provë të vetme me 4 vjet e 8 muaj burgim.

Ai e ka akuzuar Gjykatën e cila morri vendim, se nuk ka pasur guxim për të marrë vendim të drejtë për Naser Kelmendin.

“Riciklim i gabimit të gjykatës, si pasojë e guximit, gjykata u frikua të marrë vendim të drejtë për Naser Kelmendin. Kam frikë që nëse nuk e zvarrisin për ta parashkru, aktagjykimin lirues vetëm vdekja e shpëton. Sepse nuk ka asnjë provë te vetme për asnjë fjalë apo fjali që shkruhet në aktakuzë”, ka thënë ai.

Avokati Berisha, tha se Naser Kelmendi është futur në listën e zezë të Barack Obamës, për shkak të gënjeshtrave.

Gjykata Themelore në Prishtinë ka shpallur aktgjykim dënues ndaj të akuzuarit për trafikim me narkotikë, Naser Kelmendi, duke e dënuar me 4 vjet e 8 muaj burgim.

Aktgjykimi ndaj të akuzuarit Kelmendi është shpallur të enjten, nga kryetarja e trupit gjykues, Suzana Çerkini.

Sipas aktgjykimit, koha e kaluar në privim lirie, do t’i llogaritet në shqiptimin e dënimit.

Sipas gjykatëses Çerkini, lidhur me nxjerrjen e këtij aktgjykimi, gjykata ka vlerësuar rrethanat lehtësuese dhe rënduese.

Si rrethanë rënduese, gjykata ka marrë përfshirjen e shumë personave, metodat e sofistikuara për fshehjen e narkotikëve, ndërsa si rrethanë lehtësuese është marrë koha e kaluar që nga kryerja e veprës penale, nga e cila kohë nuk është gjetur ndonjë vendim i formës së prerë që i akuzuari ka kryer ndonjë vepër të njëjtë apo të ngjashme.

Në pajtim me dispozitat ligjore të KPRK-së, i akuzuari Kelmendi është i detyruar të paguajë shumën prej 300 eurosh për paushallin gjyqësor dhe 100 euro për fondin për kompensimin e viktimave të krimit.

Aktgjykimi u shpall në mungesë të të akuzuarit Kelmendi.