Gordan Grlic Radman, ministër i Jashtëm i Kroacisë, është duke qëndruar për një vizitë në Kosovë, ku edhe është takuar me homologen e tij kosovare Donika Gërvalla, shkruan Gazeta Metro.
Ministri kroat, në konferencën për media ka thënë se, Kroacia e mbështet Kosovën në rrugën e kësaj të fundit drejt anëtarësimit në organizatat ndërkombëtare.
Ai ka deklaruar edhe se, nga Kosova dhe Serbia pret avancim të marrëdhënieve.
“Në bisedë gjithashtu e dhashë mbështetjen e Kroacisë për anëtarësimin e Kosovës në të gjitha organizatat ndërkombëtare, gjithashtu kemi përshëndetur liberalizimin e vizave për Kosovën. Për dialogun Kosovë-Serbi presim avancim të marrëdhënieve, të gjitha palët presin hapat të mëtejmë”, ka thënë ai.
Ministri kroat ka theksuar se Kosova dhe Kroacia janë shtete mike dhe se kjo e fundit është ndër shtet e para që e ka pranuar pavarësinë e Kosovë.
“Gjithashtu kemi theksuar se Kosova dhe Kroacia janë shtete mike, Kroacia është ndër shtetet e para që e ka pranuar pavarësinë e Kosovës, rezultati është edhe në vizitat bilaterale. Kjo vizitë pas 2 vitesh është që të përforcojmë akoma më shumë marrëdhëniet mes dy vendeve”, ka theksuar Radman.
Pos këtyre, Radman, ka përshëndetur marrëveshjen e fundit mes Kosovës dhe Serbisë për personat e pagjetur.
“Lidhur me këtë përshëndesim marrëveshjen e fundit Kosovë-Serbi për personat e pagjetur. Shpresoj se do të zgjidh problemet me personat e pagjetur. Kroacia që 30 vite është duke kërkuar mbi tre mijë persona të zhdukur. Gjithashtu e përshëndesim vendimin e Këshillit të Evropës. Shpresoj se kjo do të rregullohet në një periudhë të shpejt dhe ta shohim Kosovën anëtare së shpejti. Ky do të jetë hap i madh për Kosovën, si dhe Kroacia mund të jap kontribut të veçantë”, u shpreh Radman
