Deputetja e PDK-së, Blerta Deliu-Kodra ka hedhur kritika ndaj Qeverisë dhe kreut të saj Albin Kurti, për deklaratat e tyre sa i përket sistemit të Drejtësisë dhe atij Prokurorial të Kosovës, lidhur me çështjen e ish-kryeshefit të KEK-ut, Nagip Krasniqi.
Madje Blerta Deliu-Kodra, tha se në momentin kur hetohen njerëzit e Qeverisë Kurti, Lëvizja Vetëvendosje nxjerrë gjithë “artilerinë”e saj, siç tha ajo, jo vetëm brenda por edhe jashtë vendit duke iu referuar Shqipërisë, e të cilët ajo tha se organizohen që ta atakojnë sistemin e Drejtësisë në Kosovë.
“Kur një kryeministër deklarohet kundër Prokurorisë së Shtetit dhe thotë që kjo prokurori ka agjentë ndaj meje si kryeministër dhe ndaj LVV-së, dtth kur cenohen njerëzit e tij me vepra të përfshira që janë duke u hetu për vepra kriminale partia LVV nxjerr gjithë artilerinë e saj jo vetëm brenda Kosovës, Diona Mihajli, Shqipëria, deputetë të organizuar, të gjithë njëzëri të organizuar që ta atakojnë sistemin e Drejtësisë në Kosovë”, tha ajo në Tëvë1.
Teksa tha se “sot e ki ministren e Drejtësisë që i kërcënon prokurorët sot ishte e njëjta qasje. Nuk munden ata me dalë prej petkut qeveritar dhe me lujtë rolin e opozitës”.
Ndryshe ditë më parë kryeministri i Kosovës, Albin Kurti, e kishte quajtur gëzim opozitar, arrestimin e kryeshefit të KEK-ut, Nagip Krasniqi.
Kujtojmë se javën e kaluar, kryeshefi i KEK-ut, Nagip Krasniqi, është arrestuar nga policia e Kosovës.
Ai akuzohet për veprat penale: Keqpërdorimi i pozitës apo autoritetit zyrtar, ushtrim i ndikimit dhe konflikt interesi.
