Sekretari amerikan i Shtetit Antony Blinken tha se janë “thellësisht të shqetësuar” nga aktivitetet e kompanisë ruse të sigurisë “Wagner Group në Sudan, transmeton AA.
Blinken foli në konferencën e përbashkët për shtyp me homologun e tij kenian, Alfred Mutua, i cili vizitoi SHBA-në.
Duke theksuar se ata janë “thellësisht të shqetësuar” nga aktivitetet e Grupit Wagner në Sudanin e përfshirë nga konflikti, Blinken tha: “Kur (Grupi Wagner) përfshihet, kjo sjell me vete më shumë shkatërrim dhe vdekje”.
Duke thënë se SHBA-ja nuk dëshiron të shohë më shumë aktivitete e të Wagnerit në Sudan, Blinken deklaroi se shumë vende janë gjithashtu të shqetësuara për këtë çështje.
“Ne duam që vendi të lihet në duart e veta pa ndërhyrje nga forcat e jashtme ose grupe të tjera në procesin e paqes në Sudan”, tha nga ana tjetër Mutua.
Pretendohet se Grupi Wagner mbështet Forcat e Mbështetjes së Shpejtë (RSF) në konflikt me ushtrinë në Sudan.
Komandanti i RSF-së, Muhammed Hamdan Dagalu, në lidhje me marrëdhëniet e RSF-së me forcat ruse Wagner dhe pretendimet se ka marrë ndonjë mbështetje nga jashtë, ka deklaruar: “Nuk është e vërtetë që kemi marrë ndonjë mbështetje nga jashtë. Ne nuk kemi kërkuar mbështetje nga jashtë”.
Thuhet se kompania ruse e sigurisë Wagner operon në Angola, Algjeri, Republikën Demokratike të Kongos, Republikën e Afrikës Qendrore, Madagaskar, Mali, Mozambik, Sudan dhe Zimbabve.
Zyra e Koordinimit Humanitar të OKB-së (OCHA) ka njoftuar se të paktën 427 persona kanë humbur jetën dhe më shumë se 3.700 persona janë plagosur në përleshjet në Sudan deri më tani.
