Mosmarrëveshjet mes qytetarëve shpesh herë përcillen me ofendime e kërcënime ndaj njëri-tjetrit. Madje nuk janë të rralla rastet kur ato shpërthejnë në dhunë, duke u përleshur fizikisht mes vete, raporton Gazeta Sinjali.
E një problem i mëhershëm dyshohet se u bë shkak që një person në Obiliq të sulmohet fizikisht.
Sinjali mëson se dy persona dyshohet se kanë sulmuar një 21-vjeçar dhe të njëjtit i kanë shkaktuar lëndime trupore.
Si pasojë e lëndimeve që mori, viktima ka kërkuar ndihmë mjekësore në spital, ndërkohë që rastin e ka denoncuar edhe në Polici.
Bazuar në dëshminë e tij, gjithçka ka ndodhur për shkak të hakmarrjes nga një problem i mëhershëm që ka pasur me të dyshuarit.
Dy të rinjtë janë arrestuar dhe janë shoqëruar në stacion policor ku janë përballur me denoncimin ndaj tyre.
Pas përfundimit të procedurave policore, Prokurori i Shtetit ka nxjerrë aktvendim që të dyshuarve t’u caktohet masa e ndalimit policor dhe të njëjtit do të hetohen nën dyshimet për kryerjen e veprës penale ‘Lëndim i lehtë trupor’.
