Kryetari i Prishtinës, Përparim Rama, ka shpalosur disa detaje pasi komuna që ai e drejton, ka planifikuar që qytetarët të cilët janë të interesuar të adoptojnë qen endacakë do të subvencionohen me nga 50 euro në muaj.
Përveç subvencionimit prej 50 euro, ata të cilët pajtohen të adoptojnë qen, do t’u ofrohet trajtim falas nga veterinari i kryeqytetit në Qendrën për Trajtimin e Qenve Endacakë, që pritet të funksionalizohet së shpejti.
E sipas Ramës, largimi i qenve endacakë do të vazhdojë çdo ditë derisa të largohen të gjithë qentë nga rrugët.
“Paralelisht me aksionin e largimit të qenëve, unë kam marrë një vendim për subvencionim të të gjithëve që strehojnë qentë endacakë. Çdo strehimore, operator ekonomik ose qytetar që strehon një qen endacakë do të merr 50 euro në muaj subvencionim”, tha Rama në një video të publikuar në Facebook.
Ai shtoi se të gjithë qentë që janë vendosur në strehimore mund të adoptohen nga qytetarët.
“Ndarja e kësaj shume është e domosdoshme për të strehuar qentë në mënyrë humane dhe për të mbuluar shpenzimet e ushqimit dhe kushtet higjienike. Ndarja e kësaj shume është e domosdoshme për të ofruar siguri për qytetarët tanë”.
