Sot, shënohen 27 vjet nga vrasja e Ilir Konushevcit, njërit prej themeluesve të UÇK-së në Llap dhe njërit ndër mbështetësit dhe kontribuuesve të rëndësishëm të sektorit të logjistikës për UÇK-në.
Ilir Konushevci lindi më 20 qershor 1969 në fshatin Llugë të komunës së Podujevës. Fëmijërinë e kaloi në fshatin e lindjes dhe kreu shkollën fillore në Lluzhan, ndërsa të mesmen në Podujevë. Ai u regjistrua në Shkollën e Lartë në Ferizaj, por nuk arriti ta përfundojë për shkak të aktiviteteve të tij atdhetariste.
Më 13 maj 1992, së bashku me shokët Rexhep Uka, Selim Haziri, Naim Hyseni, Lulëzim Podvorica, Naim Haziri, Bejtush Llugaliu dhe Shaip Haziri, themeluan grupin ilegal apolitik “Shqiponjat”. Ky grup ishte i organizuar për t’u kundërvënë atyre që rrezikonin pasurinë dhe sigurinë e njerëzve në Kosovë, duke përdorur gjithashtu strategjinë luftarake për të realizuar qëllimet e tij.
Në betimin e dhënë nga anëtarët e grupit, theksohet: “Betohem para flamurit dhe para shokëve se detyrat, të cilat i parashtron grupi, do t`i kryej me besnikëri dhe nëse është nevoja, edhe jetën do ta jap për realizimin e idealit tonë”.
Në vitin 1993, grupi i “Shqiponjave” hyri në kontakt me LKÇK-në, dhe pas një periudhe bashkëpunimi, u angazhua në shpërndarjen e organit të LKÇK-së, “Çlirimi”. Ky bashkëpunim zgjati deri në fillim të vitit 1994, kur grupi i “Shqiponjave” kaloi në ilegalitet për të shmangur kërcënimet e mundshme.
Në qershor të vitit 1996, Iliri u njoh me komandantin Zahir Pajaziti dhe e ndoqi atë deri në vrasjen e Zahirit më 1997, ku pas kësaj, kaloi në ilegalitet në Shqipëri, duke vazhduar aktivitetin e tij luftarak për çlirimin e Kosovës.
Në Shqipëri, ai bashkëpunoi ngushtë me Adrian Krasniqin dhe shumë luftëtarë të tjerë të UÇK-së. Ai u angazhua në furnizimin me armatim, një detyrë e rëndë dhe të rrezikshme, e kryer së bashku me Ardian Krasniqin, pas vrasjes së Luan Haradinajt.
Në fillim të vitit 1998, pas vrasjes së Ardian Krasniqit, Iliri mori përsipër përgjegjësinë për sjelljen e armëve dhe koordinimin e furnizimit me material luftarak për UÇK-në. Ai udhëhoqi një rrjet bashkëpunëtorësh, duke udhëtuar mbi 30 herë në Kosovë për të dërguar armatim të llojllojshëm, përfshirë armë të rënda dhe kundërtank.
Në mëngjesin e hershëm të datës 9 maj 1998, ndërsa Iliri dhe mjeku Hazir Mala udhëtonin për në Bajram Curr me një kamion të ngarkuar me armatim, ata ranë në një pritë të organizuar nga forcat serbe, ku Iliri u vra, transmeton Gazeta Papirus.
