Komisioni për Buxhet, Punë dhe Transfere ka votuar një marrëveshje financiare ndërmjet Kosovës dhe Bankës Botërore për menaxhimin e ujit të pijshëm në pellgun e Moravës së Binçës, prej 25 milionë eurove.
Kjo marrëveshje u votua pa asnjë kundër dhe asnjë abstenim, ndërsa ministri i Financave, Punës dhe Transfereve, Hekuran Murati, tha se ky projekt është në kohëzgjatje prej 30 vjetësh.
“Me qëllim të forcimit të themeleve kombëtare për menaxhimin e sigurisë së ujit dhe përmirësimin e sigurimit të ujit në pellgun e Moravës së Binçës, ne si Ministri kemi negociuar dhe kemi arritur dakordim me ANZH-në, si anëtare e Bankës Botërore, për marrëveshjen financiare ndërkombëtare në vlere totale të kredisë prej 25.1 milionë eurove, me kohëzgjatje prej 30 vjetësh maturitet, ku 5 vjet janë grejs periudhë”, tha Murati.
Deputeti i AAK-së Pal Lekaj tha se e përkrah këtë projekt, por që kërkoi informata se kur do të fillojë implementimi.
“E shoh projekt të domosdoshëm të asaj ane dhe duhet të mbështetet, ne do të mbështesim çdo projekt që shkon në të mirë, ne e përkrahim. Pas ratifikimit të këtij projekti, sa do të shkojë deri në implementimin e këtij projekti. Pra kur është koha kur do të fillojë implementimin”.
