Presidenti i Ukrainës, Volodymyr Zelensky, tha të martën se nëse homologu i tij amerikan, Joe Biden, do të mungonte në një samit të paqes të organizuar nga Kievi në Zvicër muajin e ardhshëm, ky veprim do të duartrokitej nga presidenti rus, Vladimir Putin.
“Unë e di se ShBA-ja e mbështet samitin, por nuk e dimë se në çfarë niveli” – tha presidenti ukrainas të martën në Bruksel, në një konferencë të përbashkët për gazetarë me kryeministrin belg, Alexander De Croo, raporton agjencia “Reuters”.
“Samiti i paqes ka nevojë për presidentin Biden dhe njësoj kanë nevojë edhe udhëheqësit e tjerë, të cilët e shikojnë reagimin e Shteteve të Bashkuara. Putini vetëm do ta duartrokasë mungesën e tij, personalisht do ta duartrokasë” – shtoi Zelensky.
Të dielën, presidenti ukrainas u bëri thirrje homologëve nga ShBA-ja dhe Kina, Joe Biden e Xi Jinping, që të marrin pjesë në samitin që pritet të mbahet në Zvicër. Rusia nuk është e ftuar.
Ukraina shpreson se do të bindë sa më shumë shtete që të marrin pjesë në këto bisedime si përpjekje për ta unifikuar opinionin global rreth mënyrës së përfundimit të luftës dhe për t’ia shtruar presionin Rusisë, e cila kontrollon gati një të pestën e territorit të Ukrainës.
Uashingtoni ka sinjalizuar se e mbështet samitin e Zvicrës, por nuk ka treguar nëse në të do të marrë pjesë vetë presidenti Biden apo ndonjë zyrtar tjetër në nivel më të ulët
