Jose Mourinho insiston se nuk ka gisht në largimin e Mohamed Salahut nga Chelsea në vitin 2016, duke thënë se ishte zgjedhje e klubit e jo e tij.
Mohamed Salah po kalon një sezon mbresëlënës në sezonin debutues me Liverpoolin, që u ble për 42 milionë euro nga Roma në qershor – ai ka shënuar 43 gola në të gjitha garat, e ka ndihmuar Liverpoolin të arrijë në gjysmëfinale të Ligës së Kampionëve dhe falë tij është edhe me një këmbë në finale si dhe ditë më parë fitoi çmimin “Lojtari më i mirë i Vitit në Angli”.
Egjiptiani ishte pjesë e Chelseat para se të shkojë në Itali në formë huazimi, fillimisht te Fiorentina e më pas edhe te Roma, aty ku më pas u shit. Salah bëri vetëm 19 paraqitje me “Blutë e Londrës”, që atë kohë udhëhiqeshin nga Jose Mourinho.
Portugezi po akuzohet se ishte ai që e largoi lojtarin nga “Stamford Bridge”, por Mourinho e ka bërë të qartë se ishte vendim i klubit.
“Kur flitet se unë e shita Salahun, është gënjeshtër. Unë e bleva të, unë i thash Chelseat ta blejë atë. U pajtova ta dërgojmë në huazim, sepse kërkonte më shumë minuta dhe duhet të adaptohej, menduam se ishte e nevojshme dhe përveç kësaj, Chelsea kishte anësor… Disa prej tyre janë ende si; Willian, Eden Hazard dhe këta lojtarë janë të një tjetër niveli”, u shpreh Mourinho.
“Vendimi për ta dërguar atë në formë huazimi ishte i përbashkët, por pas kësaj, vendimi për ta shitur dhe për të përdorë ato para në transferimin e lojtarëve tjerë, nuk ishte i imi”, shtoi Mourinho.
