Burime të besueshme të Sinjalit bëjnë me dije se motoçikleta me katër rrota, që u përdor mbrëmë në incidentin e armatosur në rrugën “Vëllezërit Gërvalla” në fshatin Sllatinë të Vushtrrisë, është gjetur e djegur në periferi të fshatit Ropicë.
Zyrtarët policorë, pas bastisjes në zonë, kanë identifikuar mjetin e djegur në një lokacion të izoluar, duke përforcuar dyshimet se autori ka tentuar të zhdukë gjurmët pas sulmit me armë ndaj shtëpisë së qytetarit S.O, rreth 75-vjeçar.
Edhe pse personi i dyshuar nuk është hasur në kontrollin e kryer në një shtëpi në Ropicë, njësitë speciale dhe hetuesit rajonalë vazhdojnë kërkimet intensive për arrestimin e tij.
Rasti po trajtohet si shkaktim i rrezikut të përgjithshëm, mbajtje dhe përdorim i paautorizuar i armës. Gazeta Sinjali do ju mbajë të informuar me çdo zhvillim të ri.
